సనాతన సాధక సమష్టి – లక్ష్యాలు & మార్గాలు (Ends & Means)

	సనాతన సాధక సమష్టి – లక్ష్యాలు & మార్గాలు (ENDS & MEANS)
1)	భారతీయ సనాతన జీవన విధానపు ప్రాశస్త్యంపై అవగాహనను
	పెంచటం ద్వారా – సాంస్కృతిక  పునరుజ్జీవనం.
2)	సనాతన విలువలు, అధునాతన పద్ధతులు – ఉభయతారక
	జీవనవిధాన సూచన. (సనాతన విలువల మూలాలతో –
	ఆధునిక ధోరణుల సమన్వయం) ద్వారా – సామాజిక పునరుజ్జీవనం.
3)	వ్యక్తి ఉన్నతికి – ఆధ్యాత్మిక శిఖరాలవరకూ – సాధనా సోపాన
	మార్గ దర్శనం ద్వారా – అత్యుత్తమమైన మానవ జన్మ సార్ధకత.
4)	భారత జాతి ఆత్మగౌరవం, జాతి ప్రతిష్ఠ, జాతి ప్రయోజనాలు
	నిలపటానికై, సర్వసంసిద్ధత ద్వారా – భారత జాతీయతా స్ఫూర్తిని
	పెంపొందించటం.
5)	” సనాతన సాధక సమష్టి ” నిర్మాణం ( ఆమోదకుల, పోషకుల,
	జిజ్ఞాసువుల, ధార్మికుల, సాధకుల – సమష్టి బృందాల
	నిర్మాణం, అనుసంధానం)
6)	సంతతి శ్రేయస్సు – అనగా మన ఘన వారసత్వపు సాంస్కృతిక,
	నైతిక విలువలు అందించటం ద్వారా, మన వారసుల – భావి తరం –
	నేటి బాలల యొక్క వ్యక్తిత్వ వికాసానికి, సుఖ శాంతులకు
	దోహదం చేయటం.
7)	భారతమాత ముద్దు బిడ్డలుగా – విభిన్న సామాజిక వర్గాల మధ్య –
	సహోదర భావం, పరస్పర సదవగాహన,
	విలువలతో కూడిన జీవితం పట్ల ఆదరణ, ఆచరణ పెంచటం ద్వారా –
	భారత దేశంలోని అందరికీ శాంతియుత అభ్యుదయం.
8)	విశ్వశాంతికై భారతీయ సనాతన ధర్మం శరణ్యం –
	అనే సత్యాన్ని ఆవిష్కరించటం.

ఈ ” సనాతన సాధక సమష్టి ” ఉద్యమం గురించి :

	శ్రీరామ
	ఈ ” సనాతన సాధక సమష్టి ” ఉద్యమం గురించి :
1)	సనాతన :
	సనాతనం అనేది ఒక మతం కాదు. అది ఒక ధర్మం !
	అభ్యుదయ కరమైన ఒక శాంతియుత సహ-జీవన విధానం !
	మన నిత్య జీవితంలో, దినచర్యలో, వ్యవహార సరళిలో,
	మానసిక దృక్పథంలో నిక్షేపించబడి – తరతరాలుగా మన
	జన జీవన స్రవంతిగా వస్తూ ఉన్నది ఈ సనాతన ధర్మం.
	మారుమూల కుగ్రామంలో నున్న నిరక్షరాస్యులు కూడ –
	స్త్రీ పురుష భేదం లేకుండా – ఏది ధర్మమో ఏది న్యాయమో
	చెప్ప గలిగేంతగా మన జాతి సంస్కృతిలో జీర్ణించి పోయింది
	ఈ సనాతన ధర్మం !
	ఇట్టి సనాతన జీవన విధానపు మూలాలు
	వేదమూలకమైన భారతీయ సంస్కృతిలో ఉన్నాయి ! అందుకే
	వాటిని గురించిన అవగాహన కలిగించటం మన మొదటి ప్రక్రియ !
2)	సాధక :
	విన్న మంచిని ఆచరణలో పెట్టేందుకు
	చిత్తశుద్ధితో ప్రయత్నించేవారే సాధకులు.
	” ఈ రోజులలో ఈ భావాలు ఆచరణ-యోగ్యములా ?
	ఆచరణ-సాధ్యములా? ఏ స్థాయి వారికి ఏ సాధనలు చెప్పబడ్డాయి ?”
	అనే ఆశంకలకు సమాధానం దొరికితే, సాధకులకు చాలా
	ఉపయోగకరంగా ఉంటుంది గదా !
	అందుకే, సాధనా మార్గంలో సోపానక్రమం చూపించటానికి
	ప్రయత్నించటం మన రెండవ ప్రక్రియ !
3)	సమష్టి :
	నేటికాలంలో అతి వేగంగా మానవ జీవన విలువలు అంతరిస్తున్నాయి.
	ఈ పతనక్రమం నుంచి జాతిని కాపాడి నిలబెట్టాలంటే –
	విడి విడి వ్యక్తుల మొత్తం శక్తి కన్న బలవత్తరమైన సంఘశక్తి,
	సంఘజీవనం అవసరం. అందుకనే సమష్టి బృందాల నిర్మాణానికి
	ప్రాముఖ్యం ఇవ్వటం మన కార్యక్రమం యొక్క విశిష్టత !
	వారానికి ఒక రోజు కలిసి కూర్చుని, మన సనాతన ధర్మానికి,
	సంస్కృతికి, జాతికి, దేశానికి, సమాజానికి మనం ఏవిధంగా సేవ
	చేయగలం? వచ్చే అడ్డంకులని ఏ విధంగా దాటే ప్రయత్నం
	చేయవచ్చు ? ఎవరం ఏవిధంగా ప్రయత్నం చేస్తున్నాం,
	సాధక బాధకాలేమిటి?  అని –
	సమస్యలను, వాటి మూల కారణాలను, వాటికి పరిష్కార మార్గాలను
	చర్చిస్తూ, ఆచరణ శీలమైన పరస్పర ప్రబోధక ప్రచోదక వాతావరణాన్ని
	కల్పించుకోవటమే – మన సనాతన సాధక సమష్టి యొక్క
	మూడవ ప్రక్రియ !